कपिलवस्तुको मायादेवीमा बेपत्ता दुई वर्षीया बालिकाको शव फेला, गाउँ शोकमा

Lumbini Today -प्रकाशित मिति : कार्तिक २४, २०८२

पकडी, कपिलवस्तु — कपिलवस्तु जिल्लाको मायादेवी गाउँपालिका–१ पकडीमा एक अत्यन्तै दुखद घटना घटेको छ। शनिबारदेखि बेपत्ता भएकी दुई वर्षीया बालिका मन्शा ओझा सोमबार बिहान मृत अवस्थामा फेला परेकी छन्।

स्थानीयवासीका अनुसार मन्शा ओझा आफ्ना पाँच वर्षीय दाजुसँग खेल्न घरबाहिर निस्केकी थिइन्। तर, केही समयमै उनी हराइन्। परिवार र स्थानीयहरूले खोजतलास गरे पनि ४८ घण्टासम्म पत्ता नलागेपछि सोमबार बिहान मात्र उनको शव मर्थी खोलामा फेला परेको हो। शव घरबाट करिब तीन किलोमिटर टाढा, मायादेवी गाउँपालिका–१ र शुद्धोधन गाउँपालिका–६ को सिमानामा भेटिएको प्रहरीले जनाएको छ।

घटनास्थलमा जिल्ला प्रहरी कार्यालय कपिलवस्तुका टोली पुगेका थिए। शवलाई पोष्टमार्टमका लागि कपिलवस्तु अस्पताल तौलिहवा पठाइएको र घटनाको थप अनुसन्धान भइरहेको प्रहरीले जानकारी दिएको छ।

अचानक यति सानी बालिकाको मृत्युले गाउँ नै स्तब्ध बनेको छ। गाउँका बासिन्दाले “यस्तो पीडादायी घटना कल्पना गर्नै नसकिने” प्रतिक्रिया दिएका छन्।

मृतक बालिकाको अन्त्येष्टि सोमबार साँझ धार्मिक परम्पराअनुसार सम्पन्न गरिएको छ।
यस घटनाले मायादेवी गाउँ मात्र होइन, पूरा कपिलवस्तु जिल्लालाई शोकमा डुबाएको छ।
भिडियो ।